शरद पवार अन् सुप्रिया सुळे यांच्यातील नात्याचा ‘तो’ प्रसंग पाहून पंतप्रधान नरेंद्र मोदीही भारावले..!

मुंबई : प्रतिनिधी

गानसम्राज्ञी भारतरत्न लता मंगेशकर यांच्यावर शिवाजी पार्कमध्ये काल सायंकाळी साडेसहाच्या सुमारास अंत्यसंस्कार करण्यात आले. अंत्यसंस्कारासाठी पंतप्रधान नरेंद्र मोदी, मुख्यमंत्री उद्धव ठाकरे, राज्यपाल भगतसिंह कोश्यारी, ज्येष्ठ नेते शरद पवार, उपमुख्यमंत्री अजित पवार यांच्यासह मंत्रिमंडळातील अनेक मंत्री, खासदार यांच्यासह अनेक क्षेत्रातील मान्यवर उपस्थित होते. यावेळी शरद पवार आणि खासदार सुप्रिया सुळे यांच्यातील बापलेकीचा नात्याचा अनोखा बंध सगळ्यांना पाहायला मिळाला.

लतादीदींच्या अंत्यदर्शनासाठी शरद पवार यांनी आपल्या पायातील बूट काढले. ते लतादिदींच्या अंत्यदर्शन घेऊन पुन्हा त्यांच्या जागेवर बसण्यासाठी परतलले असता सुप्रिया सुळे त्यांच्यापाशी पोहोचल्या. त्यावेळी बाप लेकीच्या भावनिक नात्याचा बंध कॅमेऱ्यात कैद झाला. सुप्रिया सुळे यांनी स्वत: आपल्या पदाचा आणि राजकीय प्रतिष्ठेचा कुठलाच विचार न करता खाली बसून शरद पवार यांच्या पायात बूट घातले.

समोरच बसलेले पंतप्रधान नरेंद्र मोदी हेही बाप-लेकीचे अनोखे बंध पाहून भारावून गेल्याचे कॅमेऱ्यात कैद झाले. शरद पवार यांनी वयाची ऐंशी पार केली आहे. या वयातही ते सगळ्यांच्या सुख-दु:खात सामील असतात. सुप्रिया सुळे यांनी खाली बसत शरद पवार यांच्या पायात स्वतः बूट घातला. या प्रसंगावरून बाप-लेकीचे घट्ट नात्याचा प्रसंग सगळ्यांना पाहायला मिळाला.