बारामती : प्रतिनिधी
कौटुंबिक वादातून पत्नीने पतीच्या अंगावर उकळतं पाणी टाकल्याची घटना बारामती तालुक्यातील पारवडी येथे घडली होती. त्यामध्ये जखमी झालेल्या सागर कुंभार याच्यावर पुण्यातील ससून रुग्णालयात उपचार सुरू होते. मात्र रात्री उशीरा त्यांचा उपचारादरम्यान मृत्यू झाला आहे. या घटनेनंतर बारामती तालुक्यात हळहळ व्यक्त होत आहे.
सागर मधुकर कुंभार (वय ३५, रा. जाधववस्ती, पारवडी) असं या घटनेत मृत पावलेल्या दुर्दैवी पतीचं नाव आहे. तर त्याची पत्नी कविता सागर कुंभार हिला पोलिसांनी अटक करून येरवडा कारागृहात रवानगी केली आहे. याबाबत माहिती अशी की, मंगळवार दि. १० ऑक्टोबर रोजी सागर कुंभार आणि त्याची पत्नी कविता कुंभार या दोघांमध्ये वाद झाला होता. त्यातूनच पहाटेच्या वेळी कविताने सागरच्या अंगावर उकळतं पाणी ओतून त्याला जीवे मारण्याचा प्रयत्न केला होता.
या घटनेत सागरच्या तोंडासह छाती, पोट, गुप्तांग आणि पाठीमागील बाजूवर मोठ्या प्रमाणात भाजले होते. त्याच्यावर पुण्यातील ससुन रुग्णालयात उपचार सुरू होते. रात्री उशीरा सागरचा उपचारादरम्यान मृत्यू झाला आहे. त्यामुळे कुंभार कुटुंबियांवर दु:खाचा डोंगर कोसळला असून घरातील कर्ता मुलगाच गेल्यामुळे मानसिक धक्का बसला आहे.
दरम्यान, या प्रकरणी बारामती तालुका पोलिसांनी कविता कुंभार हिच्यावर भादंवि कलम ३०७, ३२४, ५०६ नुसार गुन्हा दाखल करत तिला अटक केली होती. आता सागरच्या मृत्यूनंतर अतिरिक्त कलमे लावून पुढील कारवाई केली जाणार आहे. या घटनेचा अधिक तपास सहाय्यक पोलिस निरीक्षक राहुल घुगे करीत आहेत.
