पुणे : प्रतिनिधी
संपूर्ण राज्याचे लक्ष लागलेल्या आणि तब्बल २८ वर्षे भाजपच्या गड असलेल्या कसबा मतदारसंघात कॉंग्रेसच्या रविंद्र धंगेकर यांनी विजय मिळवला आहे. भाजपच्या हेमंत रासने यांचा ११ हजार ४० मतांनी पराभव करत महाविकास आघाडीने भाजपच्या गडाला सुरुंग लावला आहे.
मुक्ता टिळक यांच्या निधनानंतर कसबा पोटनिवडणुक पार पडली. यामध्ये मविआने कॉंग्रेसच्या रविंद्र धंगेकर यांना उमेदवारी दिली होती. तर भाजपकडून हेमंत रासने यांचा उमेदवारी अर्ज दाखल करण्यात आला होता. सुरुवातीपासूनच रविंद्र धंगेकर हे विजयी होतील अशी चर्चा होती.
आज झालेल्या मतमोजणीत पहिल्या फेरीपासून रविंद्र धंगेकर हे आघाडीवर होते. एकूण २० फेऱ्यांमध्ये धंगेकर यांनी ११०४० मतांची आघाडी घेत या पोटनिवडणुकीत विजय मिळवला आहे. त्यामुळे २८ वर्षांपासून ताब्यात असलेल्या भाजपच्या गडाला सुरुंग लावण्यात महाविकास आघाडीला यश आले आहे.