ज्येष्ठ नेते शरद पवार यांनी जागवल्या स्व. गणपतराव देशमुख यांच्या आठवणी; सांगोल्यात केले देशमुख कुटुंबियांचे सांत्वन

पंढरपूर : प्रतिनिधी

राष्ट्रवादी कॉँग्रेसचे अध्यक्ष शरद पवार यांनी आज दिवंगत माजी आमदार गणपतराव देशमुख यांच्या कुटुंबियांची भेट घेऊन सांत्वन केले. यावेळी शरद पवार यांनी गणपतराव देशमुख यांच्या आठवणींना उजाळा दिला. शेवटपर्यंत समर्पित भावनेनं काम करणाऱ्या गणपतराव देशमुख यांच्या आठवणी सांगताना शरद पवार भावूक झाले.

विधानसभेत ५० वर्षांपेक्षा अधिक काळ प्रतिनिधीत्व केलेले माजी आमदार गणपतराव देशमुख यांचे ३० जुलै रोजी निधन झाले. त्यानंतर आज शरद पवार यांनी देशमुख कुटुंबियांची भेट घेत त्यांचे सांत्वन केले.  यावेळी गणपतराव यांच्या पत्नी रतनबाई, मुलगा चंद्रकांत ,पोपटराव , मुलगी शोभा पाटील, नातू  डॉ अनिकेत व डॉ बाबासाहेब उपस्थित होते.

यावेळी बोलताना शरद पवार म्हणाले, माझ्या घरातील सर्व सदस्य शेकाप विचारांचे होते. माझ्या घरी जी वर्दळ असायची ती सर्व शेकापच्या लोकांची असायची. गणपतराव यांचेही येणेजाणे होते. एक अत्यंत निर्मळ मनाचा माणूस, व्यक्तिगत कोणतीही अपेक्षा न ठेवता लोकांच्या प्रश्नांबद्दल अतिशय काळजी असणारे असे हे व्यक्तिमत्व. महाराष्ट्रातील दुष्काळी भाग, पिण्याचे पाणी आणि शेतीसाठी पाणी या प्रश्नावर अखंड चिंता आणि चिंतन त्यांनी केले. मी १९६७ साली विधिमंडळात आलो, ते माझ्या पाच वर्षे आधी आले.

माझ्या मंत्रिमंडळात ते शेती खात्याचे मंत्री होते. मला आठवतंय जेव्हा मंत्रिमंडळाची स्थापना करायची होती, तेव्हा गणपतरावांचे म्हणणे होते की मला मंत्रिपद देऊ नका. शेकाप पक्षाची ताकद रायगड जिल्ह्यात असल्यामुळे तेथील नेते दि. बा. पाटील यांना मंत्रिपद द्या, असा त्यांचा आग्रह होता, असे सांगत गणपतराव देशमुख यांनी मंत्रीपद कसे नाकारले यांचा किससाच शरद पवार यांनी सुनावला.  

ग्रामीण भागातील नागरिकाला दोन वेळच्या अन्नासाठी झगडावे लागू नये, कष्टकऱ्यांचा कायदेशीर अधिकार हे सूत्र आपल्याला आणायचे आहे. त्यासाठी रोजगार हमी योजनेचे धोरण आपल्या सरकारने आणले पाहिजे, असा त्यांचा आग्रह होता. जेव्हा मंत्रिमंडळाची स्थापना झाली तेव्हा रोहयोची जबाबदारी आम्ही गणपरावांकडेच दिली. यासाठी आम्हाला त्यांची समजूत घालून मंत्रिपद द्यावे लागले होते. आज रोहयो योजना देशपातळीवर स्वीकारली गेली आहे. त्याचे सूत्र हे महाराष्ट्रात आणि सोलापूर जिल्ह्यात होते.

गणपतराव देशमुख यांच्यासारखा स्वच्छ चारित्र्यसंपन्न असा नेता मिळणे, हे महाराष्ट्राचे भाग्य होते. व्यक्तिगत सलोखा त्यांनी कधी सोडला नाही. मी मागे लोकसभेसाठी या भागातून उभा राहिलो होतो, तेव्हा त्यांनी मला स्पष्ट सांगितले या भागात येण्याची गरज नाही, इथे माझी जबाबदारी आहे. त्यांनी मला इथून मोठा लीड मिळवून दिला होता, अशी आठवणही शरद पवार यांनी यावेळी सांगितली.

गणपतराव देशमुख हे सांगोला जिल्ह्यापुरते मर्यादित नाहीत. तर महाराष्ट्रातील संबंध कष्टकरी, दुष्काळी भागातील जनतेचे ते नेते आहेत. खरंतर मला अंत्ययात्रेला यायचे होते. मात्र संसदेचे अधिवेशनामुळे मला येता आले नाही, याची खंत वाटते. त्यांच्यासारखा व्रतस्थ राजकारणी पुन्हा होणे नाही. त्यांच्या कार्याचे स्मरण कायम राहील, असे नमूद करत शरद पवार यांनी गणपतराव देशमुख यांच्या अनेक आठवणींना उजाळा दिला.