बारामती : प्रतिनिधी
ज्येष्ठ नेते शरद पवार यांच्या मुंबईतील सिल्वर ओक या निवासस्थानी भ्याड हल्ला झाला. यामागे अनेकांचा हात असण्याची शक्यता असल्याचे सांगत आता शांत न बसता या हल्ल्याला सडेतोड उत्तर देऊ असा इशारा महाविकास आघाडीच्या कार्यकर्त्यांनी दिला.
ज्येष्ठ नेते शरद पवार यांच्या सिल्वर ओक निवासस्थानी झालेल्या हल्ल्याच्या निषेधार्थ आज बारामतीत महाविकास आघाडीच्या वतीने आंदोलन करण्यात आले. यावेळी संभाजी होळकर, पौर्णिमा तावरे, सचिन सातव, ॲड. राजेंद्र काळे, राजेंद्र निंबाळकर, ॲड. अशोक इंगुले, विश्वास मांढरे, इम्तियाज शिकिलकर, अमर धुमाळ, राहुल वाबळे, वनिता बनकर, अनिता गायकवाड यांच्यासह विविध संस्थांचे पदाधिकारी व महाविकास आघाडीचे कार्यकर्ते मोठ्या संख्येने उपस्थित होते.
एसटी कामगारांच्या आंदोलनाच्या नावाखाली भाडोत्री गुंड आणून शरद पवार यांच्या घरावर हल्ला करण्यात आला. यामागे मोठे षडयंत्र असण्याची दाट शक्यता आहे. त्यामुळे या सर्वांमागील सुत्रधार उघड करावा अशी मागणी यावेळी करण्यात आली.
गेली अनेक वर्षे वेगवेगळ्या प्रसंगात बारामतीकर संयम राखत आले आहेत. मात्र आता हद्द झाली असून आता शांत न बसता या भ्याड हल्ल्याला सडेतोड उत्तर देवू असा इशाराच यावेळी देण्यात आला. यावेळी महाविकास आघाडीतील राष्ट्रवादी कॉंग्रेस, शिवसेना आणि कॉंग्रेस पक्षाच्या प्रमुखांसह कार्यकर्त्यांनी मनोगत व्यक्त करत या प्रकरणाची पाळेमुळे शोधून संबंधितांवर कठोर कारवाई करण्याची आग्रही मागणी केली.
