बारामती : प्रतिनिधी
पिंपरी चिंचवड आयुक्तपदावरून बदली झालेले आयपीएस अधिकारी कृष्ण प्रकाश यांनी आज ज्येष्ठ नेते शरद पवार यांची बारामती येथील गोविंद बाग या निवासस्थानी भेट घेतली. कार्यकाल पूर्ण होण्यापूर्वीच झालेल्या बदलीच्या पार्श्वभूमीवर त्यांनी ही भेट घेतल्याचे समजते.
ज्येष्ठ नेते शरद पवार हे आज बारामतीत आहेत. आज सकाळी शरद पवार यांच्या भेटीसाठी विविध क्षेत्रातील मान्यवर उपस्थित होते. या दरम्यान, पिंपरी चिंचवडच्या आयुक्तापदावरुन तडकाफडकी बदली झालेले आयपीएस अधिकारी कृष्ण प्रकाश यांनी शरद पवार यांची भेट घेतली.
राज्यातील आयपीएस अधिकाऱ्यांच्या नुकत्याच बदल्या करण्यात आल्या. त्यामध्ये पिंपरी चिंचवडचे पोलिस आयुक्त कृष्ण प्रकाश यांचीही बदली करण्यात आली आहे. या पार्श्वभूमीवर त्यांनी शरद पवार यांची भेट घेतल्याचे बोलले जात आहे.
