बारामती : प्रतिनिधी
बारामतीतील ज्येष्ठ नगरसेवक तथा विद्या प्रतिष्ठानचे विश्वस्त किरण गुजर यांच्या खाटीक गल्ली येथील घराला अचानक आग लागली. त्यामध्ये एक मजला जळून खाक झाला असून मोठे नुकसान झाले आहे. सुदैवाने बारामती नगरपरिषदेच्या अग्निशमन दलाने वेळीच धाव घेत ही आग आटोक्यात आणली. त्यामुळे पुढील अनर्थ टळला.
आज सकाळी १०.३० वाजण्याच्या सुमारास किरण गुजर यांच्या खाटीक गल्ली येथील निवासस्थानी असलेल्या मजल्यावर अचानक आग लागली. किरण गुजर हे नेहमीप्रमाणे नटराज नाट्य कला मंडळात थांबलेले असताना त्यांना या घटनेची माहिती मिळाली. त्यांनी याबाबत बारामती नगरपरिषदेच्या अग्निशमन दलाला कल्पना देत घटनास्थळी धाव घेतली. बारामती नगरपरिषदेच्या अग्निशमन दलाने तात्काळ घटनास्थळी दाखल होत आग नियंत्रणात आणली. त्यामुळे मोठा धोका टळला.
या आगीमध्ये संपूर्ण फर्निचर, कपडे आणि इतर साहित्य जळून खाक होवून मोठे नुकसान झाले आहे. सुदैवाने या मजल्यावर कोणीही नव्हते. विशेष म्हणजे अग्निशमन दलाने वेळीच आग आटोक्यात आणल्यामुळे इतर मजल्यांवर आगीची धग पोहोचली नाही. त्यामुळे मोठा अनर्थ टळल्याचे किरण गुजर यांनी सांगितले.
