बारामती : प्रतिनिधी
बारामती शहरातील निरा डाव्या कालव्यावर असलेल्या वितरण नलिकेसह दबाव नलिकेचे स्थलांतर केले जाणार आहे. त्यामुळे उद्या गुरुवार दि. २८ एप्रिल आणि परवा शुक्रवार दि. २९ एप्रिल रोजी शहरातील काही भागांचा पाणीपुरवठा बंद राहणार असल्याची माहिती मुख्याधिकारी महेश रोकडे यांनी दिली.
बारामती शहरातील तीन हत्ती चौकात निरा डाव्या कालव्यावर शहराला पाणीपुरवठा करणारी वितरण नलिका आणि दबाव नलिका आहे. येथील पुलाचे सध्या काम सुरु आहे. त्यामुळे वितरण नलिका आणि दबाव नलिकेचे स्थानांतर करणे आवश्यक आहे. गुरुवार आणि शुक्रवारी या नलिका स्थलांतरित करण्याचे काम केले जाणार आहे.
नलिका स्थलांतरीत करण्याचे काम सुरु असल्यामुळे बारामती शहरातील काही भागात गुरुवारी व शुक्रवारी पाणीपुरवठा बंद राहणार आहे. गुरुवार दि. २८ एप्रिल रोजी सिद्धार्थनगर, भीमनगर, चंद्रमणीनगर, विठ्ठलनगर, कोअर हाऊस, वडार सोसायटी, वडकेनगर, सटवाजीनगर आदी संपूर्ण आमराई विभागात पाणीपुरवठा बंद राहील.
तसेच शुक्रवार दि. २९ एप्रिल रोजी विजयनगर, पोस्ट रोड, जवाहरनगर, सिनेमा रोड, महावीर पथ, बुरुड गल्ली, नेवसे रोड, सिद्धेश्वर गल्ली, कसाब गल्ली, सनगर गल्ली, श्रीराम गल्ली या भागातील पाणीपुरवठा बंद ठेवण्यात येणार आहे. त्यामुळे या भागातील नागरिकांनी पुरेसा पाणी साठा करुन पाणी काटकसरीने वापरावे असे आवाहन नगरपरिषद प्रशासनाकडून करण्यात आले आहे.
