बारामती : प्रतिनिधी
बारामती शहरातील पाणीपुरवठा अवलंबून असलेल्या नीरा डाव्या कालव्याचे आवर्तन बंद झाले आहे. उपलब्ध पाणीसाठा मर्यादीत असल्यामुळे काटकसरीचे धोरण अवलंबून पाणीपुरवठा केला जाणार आहे. त्यामुळे शहरात उद्या गुरुवार दि. ३० मेपासून एक दिवसाआड पाणीपुरवठा केला जाणार आहे. नागरिकांनी पाण्याचा काटकसरीने वापर करून प्रशासनाला सहकार्य करावे, असे आवाहन बारामती नगरपरिषदेच्या वतीने करण्यात आले आहे.
बारामती शहरात बारामती नगरपरिषदेच्या माध्यमातून पाणीपुरवठा केला जातो. शहरातून वाहणाऱ्या नीरा डाव्या कालव्यातील आवर्तनावर शहरातील पाणीपुरवठा योजना अवलंबून आहेत. नीरा डाव्या कालव्याचे चालू आवर्तन बंद झाले आहे. त्यामुळे शहरासाठी मर्यादीत पाणीसाठा उपलब्ध असल्यामुळे काटकसर करणे आवश्यक आहे. त्यामुळे उद्या गुरुवार दि. ३० मेपासून शहरात एक दिवसाआड पाणीपुरवठा केला जाणार आहे.
नव्या नियोजनानुसार उद्या गुरुवार दि. ३० मे रोजी शहर आणि ग्रामीण परिसरात पाणीपुरवठा केला जाणार असून शुक्रवारी दि. ३१ मे रोजी पाणीपुरवठा बंद ठेवला जाणार आहे. नीरा डाव्या कालव्याचे पुढील आवर्तन सुटेपर्यंत एक दिवसाआड पाणीपुरवठा होईल. आवर्तन सुरू झाल्यानंतर पुन्हा पूर्ववत पाणीपुरवठा केला जाणार आहे. या काळात नागरिकांनी पाण्याचा काटकसरीने वापर करावा, असे आवाहन मुख्याधिकारी महेश रोकडे यांनी केले आहे.
