देऊळगावमध्ये शेतकरी संघटनेचे रोहित्रावर चढून महावितरणविरोधात आंदोलन..

बारामती : प्रतिनिधी

बारामती तालुक्यातील देऊळगाव रसाळ येथे शेतकरी संघटनेच्या पदाधिकाऱ्यांनी रोहित्रावर चढून महावितरण विरोधात अनोखे आंदोलन केले. महावितरणने शेतकऱ्यांचे सक्तीने होत असलेल्या वीजबिल वसुली विरोधात हे आंदोलन करण्यात आले. आंदोलनात संघटनेच्या पदाधिकाऱ्यांनी स्वतःच शेतकऱ्यांचा वीजपुरवठा पुन्हा जोडला.

महावितरणकडून थकीत वीजबिलामुळे शेतकऱ्यांचा वीजपुरवठा खंडित करण्यात आला आहे. त्या विरोधात शेतकरी संघटना आक्रमक झाली आहे. आज बारामती तालुक्यातील देऊळगाव रसाळ येथून या आंदोलनाची सुरुवात करण्यात आली. या सक्तीच्या वीजबिल वसुलीविरोधात संघटनेच्या पदाधिकाऱ्यांनी स्वतः  रोहित्रावर चढत शेतकऱ्यांचा बंद असलेला वीजपुरवठा पुन्हा सुरळीत केला.

महावितरणला राज्य शासनाकडून शेतकऱ्यांच्या वीजपंपाचे वीज बिलापोटी अनुदान दिले जाते. मात्र तरीसुद्धा महावितरण शेतकऱ्यांकडून सक्तीने वीजबिलांची वसूली केली जात आहे. शेतकऱ्यांच्या शेतमालाच्या किमान आधारभूत किमतीत वीजबिल धरले जात नाही.  तरीही महावितरण कंपनी शेतकऱ्यांकडून वीजबिल वसूल करत आहे. ही वसुली बेकायदेशीर आहे, असा आरोप शेतकरी संघटनेकडून केला आहे.