बारामती : प्रतिनिधी
वाईन शॉपमध्ये दहशत माजवून खंडणी गोळा करणाऱ्या आरोपीस बारामती शहर पोलिसांनी अटक केली आहे. आदेश संजय कुचेकर (रा.साठेनगर कसबा, बारामती ) असे अटक करण्यात आलेल्या सराईत गुन्हेगारांचे नाव आहे.
पोलीसांनी दिलेल्या माहितीनुसार, आदेश कुचेकर याने बारामती शहरातील कसबा येथील नितीन वाईन्स शॉपमध्ये व्यवस्थापक व कामगारांना तलवारीचा धाक दाखवून त्यांना काठी व हाताने मारहाण केली. तसेच काउंटर फोडून दुकानातून रोख रक्कम व दारू जबरीने चोरून ‘मी इथला दादा आहे, मला दारूचे बिल मागायचे नाही आणि मागितले तर रोडवर समाधी बांधील’ अशी धमकी देऊन दुकानातील ग्राहकांना मारहाण केली होती.
याबाबत तक्रार दाखल झाल्यानंतर सराईत गुन्हेगार असलेल्या आदेश संजय कुचेकर याला अटक करण्यात आली. पोलीस निरीक्षक सुनील महाडिक यांच्या मार्गदर्शनाखाली पोलीस उपनिरीक्षक गणेश पाटील, युवराज घोडके, पोलीस अंमलदार रामचंद्र शिंदे, दशरथ इंगोले, अजित राऊत यांनी त्याला तातडीने ताब्यात घेतले.
याच गुंडाने दोन महिन्यापूर्वी कसबा भागातील एका युवकावर जीवघेणा हल्ला केलेला होता. हा आरोपी त्याचा जोडीदार गणेश गायकवाड व अनिल खिलारे यांच्या मदतीने त्या भागात दहशत करत असल्याची माहिती पोलीस सूत्रांनी दिली. या आरोपीचे दोन साथीदार फरार झाले असून पोलिस त्यांचा शोध घेत आहेत.
