पुणे : प्रतिनिधी
राष्ट्रवादी काँग्रेसकडून शिंदे-फडणवीस सरकार जास्त दिवस टिकणार नसल्याचे सांगण्यात येत आहे. राष्ट्रवादी काँग्रेसचे प्रदेशाध्यक्ष जयंत पाटील यांनी शिंदे-फडणवीस सरकार लवकरच कोसळणार असल्याचे म्हटले होते. यावर राज्याचे उच्च आणि तंत्र शिक्षण मंत्री चंद्रकांत पाटील यांनी जयंत पाटील यांनी सरकार पाडून दाखवावे, असे आव्हान दिले आहे.
चंद्रकांत पाटील पुण्यात पत्रकारांशी बोलत होते. त्यावेळी त्यांनी जयंत पाटलांना आव्हान दिले आहे. चंद्रकांत पाटील म्हणाले, जयंत पाटील यांनी म्हणावं सरकार पडेल. सरकार पाडण्यासाठी ताकद असावी लागते. जयंत पाटील यांनी सरकार पाडून दाखवावे, असे आव्हान चंद्रकांत पाटलांनी दिले.
पुढे बोलताना चंद्रकांत पाटील म्हणाले, भाजपाचे सर्व कार्यकर्ते हे लोकांची सेवा, अन्यायाविरुद्ध लढण्यासाठी आणि निवडणूक यासाठी बांधील आहेत.गेले अडीच वर्षे आम्ही संघर्ष केला. आम्ही सरकारला झोपू दिले. वर्षानुवर्षे सत्ता भोगलेल्या काँग्रेस आणि राष्ट्रवादी काँग्रेसमध्ये संघर्षाचा डीएनए शिल्लक राहिलेला नाही. त्यामुळे सरकार पाडायला ताकद लागते. जयंत पाटलांनी सरकार पाडून दाखवावे, असे चंद्रकांत पाटील म्हणाले.