भाजप उडवत असलेल्या नकली रंगांवर केंद्राची बंदी; संजय राऊत यांची खोचक टीका

मुंबई : प्रतिनिधी

भाजप उडवत असलेल्या नकली रंगांवर केंद्राने बंदी घातली आहे. त्याचबरोबर या रंगांप्रमाणे त्यांच्या आरोपांमध्ये भेसळ असल्याची खोचक टीका शिवसेना नेते संजय राऊत यांनी भाजप आणि केंद्रावर निशाणा साधताना केली आहे. होळीचा सण वर्षातून एकदाच येतो परंतु भाजपचा दररोज शिमगा सुरू आहे, अशा शब्दांत त्यांनी भाजपवर टीका केली आहे.

महाराष्ट्रातदेखील खड्डे  खणायला सुरुवात केली, तर त्यात कोण कोण पडेल ते बघितलं जाईल. भाजपला पाठीमागून वार करण्याची सवय आहे. फडणवीस गोव्यात जिंकले आहेत, परंतु गोवा काय आहे त्यांना आता लवकरच समजेल. पोर्तुगाल आणि इंग्रजांना गोवा समजला नव्हता फडणवीसांना काय समजणार, असा टोलाही संजय राऊत यांनी लगावला.

भाजप भेसळयुक्त रंग वापरत असून केंद्राने या रंगावर बंदी घातली आहे.  आम्ही कधीच राजकिय धुळवड साजरी केली नाही. सध्या राज्यात दररोज धुळवड साजरी केली जात आहे. भाजपला शिमगा आणि होळीमधला फरक समजला नाही.  त्यांनी नीट अर्थ समजून घ्यावा. स्वाभिमान, अखंडता आणि एकता हे महाराष्ट्राचे रंग असल्याचंही त्यांनी यावेळी स्पष्ट केले.