BIG NEWS : युवा नेते जय पवार यांची बारामतीत एंट्री; नागरीक- कार्यकर्त्यांच्या भेटीगाठी अन् समस्या-अडीअडचणींवर तात्काळ तोडगा..!

बारामती : प्रतिनिधी

उपमुख्यमंत्री अजित पवार यांचे सुपुत्र तथा राष्ट्रवादी कॉँग्रेसचे युवा नेते जय पवार यांनी आज बारामतीतील राष्ट्रवादी भवनामध्ये नागरीक आणि कार्यकर्त्यांच्या भेटी घेत त्यांच्या समस्या जाणून घेतल्या. यावेळी उपस्थितांनी सांगितलेल्या अडचणी तात्काळ सोडवत जय पवार यांनी आपल्या कामाची चुणूक दाखवली. अजितदादांप्रमाणेच ‘कामाची स्टाईल’ असलेल्या जय पवार यांच्या या भेटीवेळी तरुणांची गर्दी लक्ष वेधणारी होती.

राष्ट्रवादी कॉँग्रेस पक्षातील फुटीनंतर अजितदादांचे सुपुत्र पार्थ आणि जय पवार हे दोघेही राजकारणात सक्रिय होताना दिसत आहेत. नुकत्याच झालेल्या लोकसभा निवडणुकीत जय पवार यांनी आई सुनेत्रा पवार यांच्या प्रचाराची धुरा सांभाळली. पार्थ पवार यांनीही या निवडणुकीत आपलं कसब दाखवत थेट मतदारांच्या भेटींवर दिला होता. त्यानंतर आता जय पवार यांनी बारामतीत प्रत्येक आठवड्याला राष्ट्रवादी भवनात नागरिक आणि कार्यकर्त्यांच्या भेटीगाठी घेण्यास सुरुवात केली आहे.

जय पवार यांनी राष्ट्रवादी भवनात बसून नागरिक आणि कार्यकर्त्यांच्या भेटी घेतल्या. यावेळी नागरिक व कार्यकर्त्यांकडून सांगण्यात आलेल्या कामांसह अडचणींवर त्यांनी तात्काळ तोडगा काढत आपल्या कार्यपद्धतीची झलक दाखवली. विशेष म्हणजे जय पवार यांच्या या भेटीप्रसंगी युवकांची मोठ्या प्रमाणात गर्दी झाली होती.

कार्यकर्त्यांच्या अडीअडचणी समजून घेण्यासह त्यांनी सांगितलेली कामे मार्गी लावण्यासाठी जय पवार आग्रही असतात. त्याचवेळी संघटनेच्या कामकाजावरही जय पवार हे लक्ष देत आहेत. पक्ष संघटनेतील अडीअडचणीही ते सोडवत आहेत. त्यामुळे कार्यकर्त्यांमध्ये विशेषत: युवकांमध्ये जय पवार यांच्या भेटीमुळे उत्साहाचं वातावरण निर्माण झाले आहे.