BIG BREAKING : ज्येष्ठ नेते शरद पवार ब्रीच कॅन्डी रुग्णालयात दाखल; तीन दिवस होणार उपचार

मुंबई : प्रतिनिधी

राष्ट्रवादी कॉंग्रेसचे अध्यक्ष, ज्येष्ठ नेते शरद पवार यांना मुंबईतील ब्रीच कॅन्डी रुग्णालयात दाखल करण्यात आले आहे. पुढील तीन दिवस त्यांच्यावर उपचार केले जाणार असून त्यानंतर त्यांना डिस्चार्ज मिळणार असल्याची माहिती राष्ट्रवादी कॉंग्रेसकडून देण्यात आली आहे.

दिवाळीनिमित्त संपूर्ण पवार कुटुंबीय बारामतीत होते. शरद पवार यांनीही बारामतीतील विविध कार्यक्रमांना हजेरी लावण्यासह कार्यकर्ते आणि विविध मान्यवरांना भेटीसाठी वेळ दिला होता. पाडव्यादिवशी दिवाळी भेट कार्यक्रमानंतर शरद पवार यांना व्हायरल इन्फेक्शनमुळे त्रास जाणवत असल्यानं त्यांनी आपला सोलापूर दौराही रद्द केला होता.

दरम्यानच्या काळात त्रास जाणवत असल्याने त्यांना आज मुंबईतील ब्रीच कॅन्डी रुग्णालयात दाखल करण्यात आले आहे. त्यांच्यावर पुढील तीन दिवस उपचार सुरु राहणार असल्याची माहिती राष्ट्रवादीचे सरचिटणीस शिवाजीराव गर्जे यांनी प्रसिद्धीपत्रकाद्वारे दिली आहे. शरद पवार यांना २ नोव्हेंबर रोजी रुग्णालयातून डिस्चार्ज दिला जाणार आहे.

३ नोव्हेंबर रोजी शरद पवार हे शिर्डीला जाणार आहेत. ४ व ५ नोव्हेंबर रोजी होणाऱ्या राष्ट्रवादी कॉंग्रेस पक्षाच्या अधिवेशनाला शरद पवार उपस्थित राहून मार्गदर्शन करणार आहेत. दरम्यान, शरद पवार यांच्यावरील उपचारादरम्यान कार्यकर्त्यांनी रुग्णालय परिसरात गर्दी न करण्याचे आवाहन करण्यात आले आहे.