BIG BREAKING : माजी खासदार नीलेश राणे यांनी केली राजकीय निवृत्तीची घोषणा; ट्विट करत दिली माहिती

सिंधुदुर्ग : प्रतिनिधी

केंद्रीय मंत्री नारायण राणे यांचे पुत्र आणि सिंधुदुर्ग-रत्नागिरी लोकसभा मतदारसंघाचे माजी खासदार नीलेश राणे यांनी दसऱ्यादिवशी मोठी घोषणा केली आहे. आपण सक्रिय राजकारणातून कायमची निवृत्ती घेत असल्याचं ट्विट नीलेश राणे यांनी केलं आहे. नीलेश राणे यांच्या या पवित्र्यामुळे राजकीय क्षेत्रात चांगलीच खळबळ उडाली आहे.

राजकारणातून बाजूला होत असल्याबाबत नीलेश राणे यांनी एक ट्विट केलं आहे. या ट्विटमध्ये नीलेश राणे म्हणतात, मी सक्रिय राजकारणातून कायमचा बाजूला होत आहे. आता राजकारणात मन रमत नाही, इतर काही कारण नाही. मागच्या १९/२० वर्षांमध्ये आपण सगळ्यांनी मला खूप प्रेम दिले. कारण नसताना माझ्या सोबत राहिलात, त्या बद्दल मी आपला खूप आभारी आहे. BJP मध्ये खूप प्रेम भेटले आणि BJP सारख्या एका उत्तम संघटनेत काम करण्याची संधी मिळाली. त्या बद्दल मी खूप नशीबवान आहे असेही त्यांनी नमूद केले आहे.

मी एक लहान माणूस आहे पण राजकरणात खूप काही शिकायला मिळाले आणि काही सहकारी कुटुंब म्हणून कायमचे मनात घर करून गेले, आयुष्यात त्यांचा मी नेहमी ऋणी राहीन. निवडणूक लढवणे वगैरे यात मला आता रस राहिला नाही, टीका करणारे टीका करतील पण जिथे मनाला पटत नाही तिथे वेळ स्वत:चा आणि इतरांचा वाया घालवणे मला पटत नाही. कळत नकळत मी काही लोकांना दुखावलं असेल त्याबद्दल मी दिलगिरी व्यक्त करतो असेही या ट्विटमध्ये म्हटले आहे.

दरम्यान, वडील केंद्रीय मंत्री आणि लहान भाऊ आमदार असताना नीलेश राणे यांनी निवृत्तीची घोषणा केल्यामुळे आश्चर्य व्यक्त होत आहे. ऐन दसऱ्या दिवशीच नीलेश राणे यांचा निवृत्तीचा निर्णय राजकीय क्षेत्रात खळबळ उडवून देणारा ठरला आहे.