एकतर्फी प्रेमातून अल्पवयीन मुलीवर चाकू हल्ला; आरोपीला पोलीसांनी केली अटक

पुणे : प्रतिनिधी

एकतर्फी प्रेमातून अल्पवयीन मुलीवर चाकूने हल्ला केल्याची धक्कादायक घटना पुण्यातील वडगाव शेरी येथे घडली आहे. या हल्ल्यात मुलगी गंभीर जखमी झाली असून तिच्यावर उपचार सुरू आहेत. याप्रकरणी सिंहगड पोलिसांनी ऋत्विक अशोक दिघे (वय – १९ वर्षे, दत्तनगर, कात्रज) याच्यावर गुन्हा दाखल करून अटक केली आहे.

याबाबत संबंधित मुलीच्या आईने सिंहगड पोलिस ठाण्यात फिर्याद दिली आहे. पोलिसांकडून मिळालेली माहिती अशी की,  ऋत्विक दिघे याने आनंदनगर येथील एका अल्पवयीन मुलीशी जवळीक वाढवत मैत्री केली. आपल्या दोघांबद्दल मुलीच्या घरी सांगण्याची धमकी दिघे याने त्या मुलीला दिली. त्यांनतर त्याने घरी नाव न सांगण्यासाठी ब्लॅकमेल करत तिच्याकडून पैसे उकळले.

या दरम्यान त्या मुलीवर वडगाव शेरी येथे चाकूने हल्ला केला. या हल्ल्यात मुलगी गंभीर झाली आहे. तिच्यावर वडगाव शेरी येथील खासगी रुग्णालयात उपचार सुरू आहेत. संबंधित युवकाकडून २०१९ ते मार्च २०२२ पर्यंत सातत्याने तिला धमकावण्यात आल्याची माहिती मुलीच्या आईने सिंहगड पोलिस ठाण्यात दिली आहे. त्यावरून पोलिसांनी त्याला अटक केली आहे. अधिक तपास पोलीस उपनिरीक्षक शिंदे करत आहेत.