पुणे : प्रतिनिधी
प्रेम प्रकरणात झालेल्या वादातून महिलेचे डोके भिंतीवर आपटून तिचा खून करून तिच्या अंगावरील दागिने चोरून नेल्याची घटना हडपसरमधील वैदुवाडी येथे घडली आहे. या प्रकरणी हडपसर पोलिसांनी किसन सिताराम जगताप (वय ४६, रा. नारळीचा मळा, ता. पुरंदर, जि. पुणे) याला अटक केली आहे.
याबाबत मिळालेली माहिती अशी की, मृत महिला आपल्या मुली आणि जावयासह वैदुवाडी येथे वास्तव्यास होती. किसन जगताप याच्याशी या महिलेचे प्रेम संबंध होते. त्यातूनच शनिवारी रात्री या दोघांमध्ये वाद झाला. किसन जगताप याने संबंधित महिलेचे डोके भिंतीवर आपटले. त्यामध्येच या महिलेचा मृत्यू झाला. त्यानंतर आरोपीने महिलेच्या अंगावरील दागिने, मोबाईल, एटीएम असा तब्बल ४६ हजारांचा ऐवज चोरून नेला.
रविवारी सकाळी ही बाब समोर आल्यानंतर मृत महिलेच्या मुलीने हडपसर पोलिसांना या घटनेची माहिती दिली. त्यानुसार पोलिसांनी घटनास्थळी भेट देवून संपूर्ण माहिती घेतली. या प्रकरणी किसन जगताप याला अटक करण्यात आली आहे. हडपसरचे सहायक पोलीस निरीक्षक विजयकुमार शिंदे हे या प्रकरणाचा अधिक तपास करीत आहेत.
