BIG BREAKING : रॉकेल टाकून पुतण्याला पेटवण्याचा प्रयत्न; जमिनीच्या वादातून चुलत्याचे कृत्य, जेजूरीत गुन्हा दाखल

जेजूरी : प्रतिनिधी

जमिनीच्या वादातून चक्क चुलत्यानेच पुतण्याच्या अंगावर रॉकेल टाकून त्याला पेटवून देण्याचा धक्कादायक प्रकार पुरंदर तालुक्यातील वाघदरवाडी येथे घडला आहे. या प्रकरणी जेजूरी पोलिस ठाण्यात गुन्हा दाखल करण्यात आला आहे. दरम्यान, हातात पेटता टेंभा घेऊन पुतण्याला मारतानाचा व्हिडिओ सध्या सोशल मिडियात व्हायरल होऊ लागला आहे.

या प्रकरणी शारदा नानासाहेब भुजबळ या महिलेने जेजूरी पोलिस ठाण्यात फिर्याद दिली आहे. त्यानुसार भास्कर त्रिंबक भुजबळ याच्यावर गुन्हा दाखल करण्यात आला आहे. याबाबत पोलिसांनी दिलेली माहिती अशी की, फिर्यादीचा मुलगा स्वप्नील आणि आरोपी चुलता भास्कर भुजबळ यांच्या जमिनीवरून वाद होता. भास्कर भुजबळ याने पुतण्याच्या जमिनीत अतिक्रमण करत त्यावर ऊसाची लागवड केली होती.

दि. ७ जानेवारी रोजी पुतण्या स्वप्नील याला या जमिनीवरील ऊसाची तोड होत असल्याचे समजल्यानंतर तो आपल्या आईसह शेतात गेला. त्यावेळी त्याचा चुलता भास्कर याने पेटता टेंभा आणि रॉकेलचे कॅन हातात घेऊन त्याचा पाठलाग टेंभ्याने त्याला मारहाण केली. तसेच त्याच्या अंगावर रॉकेल टाकत त्याला पेटवून देण्याचा प्रयत्न केला. यात स्वप्नीलसह त्याची आई शारदा भुजबळ यांनाही दुखापत झाली आहे. या घटनेनंतर शारदा भुजबळ यांनी जेजूरी पोलिस ठाण्यात फिर्याद दिली.

जेजूरी पोलिसांनी या प्रकरणी भास्कर भुजबळ याच्यावर कलम ३०७, ३२४, ५०४ व ५०६ नुसार गुन्हा दाखल केला आहे. अधिक तपास पोलिस उपनिरीक्षक कुंडलीक गावडे करीत आहेत. दरम्यान, या घटनेचा व्हिडिओ सोशल मिडियात प्रचंड व्हायरल होत आहे. सख्ख्या चुलत्यानेच जमिनीच्या वादातून पुतण्यावर जीवघेणा हल्ला केल्यामुळे आश्चर्य व्यक्त होत आहे.