मैत्रिणीच्या सोशल मीडिया अकाऊंटवर मेसेज पाठवल्याचा जाब विचारला; टोळक्याने युवकावर जीवघेणा हल्ला केला, हडपसर पोलिस ठाण्यात गुन्हा दाखल

पुणे : प्रतिनिधी 

मैत्रिणीच्या सोशल मीडिया अकाऊंटवर मेसेज पाठवल्याचा जाब विचारणाऱ्या युवकावर एका टोळक्याने धारदार शस्त्राने वार करत जीवघेणा हल्ला केल्याची घटना पुण्यातील हडपसर परिसरात घडली. या प्रकरणी हडपसर पोलिस ठाण्यात तिघांवर गुन्हा दाखल करण्यात आला आहे.

अमोल राजाराम घाटे (वय २५, रा. माळवाडी, हडपसर, मूळ रा. नांदेड) असे या घटनेतील जखमी युवकाचे नाव आहे. त्याने हडपसर पोलिस ठाण्यात दिलेल्या फिर्यादीवरून अमर बसवराज जमादार (वय २०, रा. गोपाळपट्टी, मांजरी), अमन अशोक नरोटे (वय १९, रा. अष्टविनायक कॉलनी, काळेपडळ, हडपसर) आणि श्रीपती संतोष सरोदे (वय १९, रा. साडेसतरानळी, हडपसर) यांच्यावर खूनाचा प्रयत्न केल्याचा गुन्हा दाखल करण्यात आला आहे.

याबाबत मिळालेली माहिती अशी की, अमोल घाटे याच्या मैत्रिणीच्या सोशल मीडिया अकाऊंटवर आरोपींनी मेसेज पाठवला होता. अमोल हा आपला मावसभाऊ सुदर्शन दासवड याच्यासह जेवण करून घरी जात होता. त्यावेळी माळवाडी परिसरात संबंधित आरोपी थांबले होते. अमोलने त्यांना मैत्रिणीच्या अकाऊंटवर मेसेज का केला याबद्दल विचारणा केली. त्यामुळे चिडलेल्या आरोपींनी अमोलला शिवीगाळ करत त्यांच्याकडील धारदार शस्त्राने वार केले.

या भांडणात मध्यस्थी करणाऱ्या सुदर्शन दासवड याच्यावरही या आरोपींनी वार केले. त्यानंतर हे आरोपी घटनास्थळावरून निघून गेले. या घटनेनंतर हे दोघेही रुग्णालयात दाखल झाले. त्यांनी या घटनेची माहिती हडपसर पोलिसांना दिली. पोलिसांनी या प्रकरणातील दोघा आरोपींना ताब्यात घेतले आहे. तर अमोल घाटे याच्या फिर्यादीवरून तिघांवर खूनाच्या प्रयत्नाचा गुन्हा दाखल केला आहे.