BIG BREAKING : नाशिकच्या सप्तश्रृंगी घाटात बस दरीत कोसळली; एका महिलेचा मृत्यू, अजितदादांकडून प्रशासनाला निर्देश

नाशिक : प्रतिनिधी

सप्तश्रृंगी गडावरील घाट मार्गावर राज्य परिवहन महामंडळाची बस दरीत कोसळून एका महिलेचा मृत्यू झाला आहे. तर या अपघातात २२ प्रवाशी जखमी झाले आहेत. आज सकाळी सात वाजण्याच्या सुमारास हा अपघात झाला. दरम्यान, अपघाताची माहिती कळताच उपमुख्यमंत्री अजित पवार यांनी स्थानिक प्रशासनाला जखमींवर मोफत उपचार करण्याच्या सूचना दिल्या. त्याचवेळी नाशिकचे जिल्हाधिकारी व प्रांताधिकाऱ्यांकडून अपघाताची माहिती घेतली.

राज्य परिवहन महामंडळाची बुलढाणा येथील खामगाव आगाराची बस मंगळवारी सप्तश्रृंगी गडावर रात्री उशिरा दाखल झाली. सकाळी ही बस परतीच्या प्रवासाला निघालेली असताना घाट मार्गावरील गणपती वळणावर चालकाला वळणाचा अंदाज आला नाही. त्यामुळे बस थेट दरीत कोसळली. या बसमधून जवळपास ३२ प्रवाशी प्रवास करत होते. यामध्ये एका महिलेचा मृत्यू झाला आहे. तर २२ प्रवाशी जखमी झाले आहेत.

दरम्यान, या घटनेनंतर जखमींना आवश्यक वैद्यकीय उपचार तातडीने आणि मोफत करण्याच्या सूचना राज्याचे उपमुख्यमंत्री अजित पवार यांनी स्थानिक प्रशासनाला दिल्या आहेत. आज सकाळी अपघाताची माहिती मिळताच उपमुख्यमंत्री अजित पवार यांनी तातडीने नाशिक जिल्हाधिकारी आणि कळवणच्या प्रांताधिकाऱ्यांना फोन करुन माहिती घेतली, तसेच जखमींना मोफत वैद्यकीय उपचार पुरवण्याच्या सूचना दिल्या.

पालकमंत्री दादा भूसे यांच्या मार्गदर्शनाखाली जिल्हा प्रशासनामार्फत मदतकार्य सुरु असल्याचे सांगत, अपघातात मृत्यू पावलेल्या महिला प्रवाशाच्या कुटुंबियांबद्दल सहसंवेदना व्यक्त केली. जखमींच्या प्रकृतीत लवकर सुधारणा होईल, असा विश्वासही उपमुख्यमंत्री अजित पवार यांनी व्यक्त केला आहे.