मुंबई : प्रतिनिधी
मुंबईतील कफ परेड परिसरात नशेत असलेल्या जवानांनी थेट पोलीस अधिकाऱ्यालाच मारहाण केल्याचा धक्कादायक प्रकार समोर आला आहे. या मारहाण प्रकरणी नौदलाचे दोन आणि सीआयएसएफच्या दोन अशा चार जवानांना अटक करण्यात आली आहे. दरम्यान, मारहाणीचा हा प्रकार सीसीटीव्हीत कैद झाला आहे.
याबाबत मिळालेली माहिती अशी की, नौदल आणि सीआयएसएफचे चार जवान मुंबईतील कफ परेड परिसरात टॅक्सीने फिरत होते. या दरम्यान, एका जवानाने टॅक्सीत सिगरेट पेटवली. त्याला टॅक्सी चालकाने विरोध दर्शवला. त्यामुळे संतप्त जवान आणि टॅक्सी चालकामध्ये वाद सुरू झाला. हा वाद पाहून मध्यस्थी करण्यासाठी गेलेल्या पोलीस अधिकाऱ्यालाच या जवानांनी मारहाण केली. यावेळी हे चौघे जवान दारूच्या नशेत होते अशी माहिती मिळाली आहे.
मध्यस्थी करायला गेलेल्या पोलीस अधिकाऱ्यालाच जवानांनी मारहाण केल्याने पोलिसांनी गुन्हा दाखल केला आहे. या प्रकरणी नौदलाचे दोन आणि सीआयएसएफच्या दोन अशा चौघा जवानांना अटक करण्यात आली आहे. पोलिस अधिकाऱ्याला झालेल्या या मारहाणीचा प्रकार सीसीटीव्हीत कैद झाला आहे.