जयपुर : वृत्तसंस्था
राजस्थानमधील चंबळ येथे दुर्दैवी घटना घडली आहे. लग्नाच्या वऱ्हाडातील कार नदीमध्ये कोसळून झालेल्या भीषण अपघातात नवरदेवासह ९ जणांचा जागीच मृत्यू झाला आहे. शनिवारी रात्री उशीरा नायापुर पोलीस ठाण्याच्या हद्दीत ही घटना घडली. या घटनेमुळे लग्न घरावर शोककळा पसरली असून सर्वत्र हळहळ व्यक्त होत आहे.
याबाबत माहिती अशी की, चौथ का बरवारा भागातून कोटा येथे नवरदेवाच्या वऱ्हाडाची कार आली होती. तेथून परतताना चंबळ येथे एका नदीच्या छोट्या पुलावरून कार नदीत कोसळली. यामध्ये नवरदेवासह नऊ जणांचा जागीच मृत्यू झाला आहे. तर एक जण गंभीर जखमी आहे. अपघातानंतर स्थानिक आणि पोलिसांनी तात्काळ मदतकार्य केले.
लोकसभा अध्यक्ष ओम बिर्ला यांनी या घटनेबद्दल शोक व्यक्त केला आहे. ओम बिर्ला यांनी शोक व्यक्त करताना म्हटले, या दुर्दैवी अपघातामध्ये मोठ्या प्रमाणात झालेली जीवित हानी काळजाला घर पाडणारी आहे. अपघातातील लोकांच्या अकाली जाण्यामुळे अतीव दुःख झाले आहे. मृतांच्या कुटुंबीयांना प्रती शोक व्यक्त करतो, अशा शब्दात ओम बिर्ला यांनी शोक व्यक्त केला.