कोल्हापुर : प्रतिनिधी
ज्योतिबाचे दर्शन घेवून परतणाऱ्या ऊसतोड मजूरांचा कोल्हापुर जिल्ह्यातील कासारवाडी सादळे घाटात भीषण अपघात झाला. या घाटात ऊसतोड मजुरांची ट्रॅक्टर ट्रॉली पलटी होवून एकजण ठार झाला. तर वीस जण जखमी झाले आहेत.
अशोक शंकर गावडे असे मृत्यूमुखी पडलेल्या मजुराचे नाव आहे. वारणा सहकारी साखर कारखान्याची ऊस तोडणी हंगामाची सांगता झाल्यानंतर हे सर्व ऊसतोडणी मजूर दोन ट्रॉलीतून ज्योतिबा डोंगरावर देव दर्शनासाठी गेले होते. सायंकाळी दोन ट्रॅक्टर ट्राॅलीतुन हे कामगार कोरेगावकडे जात होते. त्या दरम्यान कोरेगाव घाटात ट्रॅक्टर चालकाचा ताबा सुटल्याने ट्रॅक्टर आणि दोन ट्राँली रस्ता सोडून सुमारे पंधरा फूट खोल दरीत कोसळली.
या अपघातातील जखमींना सीपीआर रुग्णालयात उपचारासाठी दाखल करण्यात आले आहे. दर्शन घेऊन गावाकडे परतत असताना ही दुर्घटना घडली. सर्व कामगार हे सांगली जिल्ह्यातील कोरेगाव येथील आहेत.