SHOCKING NEWS : उसाच्या ट्रॅक्टरखाली चिरडून तीन वर्षांच्या बालकाचा मृत्यू; चालकावर गुन्हा दाखल

सातारा : प्रतिनिधी

ऊस वाहतूक करणाऱ्या ट्रॅक्टरखाली चिरडल्यामुळे एका तीन वर्षांच्या बालकाचा मृत्यू झाला. कोरेगाव तालुक्यातील ल्हासुर्णे गावात ही घटना घडली. या प्रकरणी ट्रॅक्टर चालकावर गुन्हा दाखल करण्यात आला आहे. 

संकेत कृष्णा जाधव असं या घटनेत मृत पावलेल्या बालकाचं नाव आहे. याबाबत पोलिसांनी दिलेली माहिती अशी की, कोरेगाव तालुक्यातील ल्हासुर्णे हद्दीत लक्ष्मण दशरथ संकपाळ यांच्या शेतात ऊस तोडणीचे काम सुरु होते. ट्रॅक्टरचालक सागर शिवाजी राठोड (रा. अल्हनवाडी, ता. पाथर्डी, जि. नगर) हा उसाने भरलेला ट्रॅक्टर (एमएच २३ बीसी ५६२३) घेऊन रस्त्याकडे जात होता. 

या दरम्यान, संकेत जाधव हा ट्रॅक्टरच्या डाव्या चाकाखाली चिरडला गेला. त्यात तो गंभीर जखमी झाला. त्याला कोरेगाव येथील उपजिल्हा रुग्णालयात दाखल करण्यात आले. मात्र उपचारादरम्यान त्याचा मृत्यू झाल्याचे डॉक्टरांनी सांगितले.

याबाबत संकेतचे वडील कृष्णा जाधव (रा. बोदेगाव, शेवगाव, जि. नगर) यांनी फिर्याद दिली. त्यानुसार ट्रॅक्टरचालकावर गुन्हा दाखल करण्यात आला आहे.