INDAPUR BREAKING : म्हसोबावाडीतील ‘त्या’ विहीरीतील मदतकार्य थांबवलं; १७ तासानंतरही गाडले गेलेल्या कामगारांचा लागला नाही शोध..!

इंदापूर : प्रतिनिधी

इंदापूर तालुक्यातील म्हसोबावाडी येथील एका विहीरीच्या रिंगचे काम सुरू असताना मलबा कोसळून चारजण गाडले गेले आहेत. या घटनेला जवळपास १७ तास उलटले असून अद्यापही या कामगारांचा शोध लागलेला नाही. दुसरीकडे अंधार पडल्यामुळे एनडीआरएफ पथक व प्रशासकीय यंत्रणेकडून शोधकार्य थांबवण्यात आलं आहे. उद्या सकाळी पुन्हा हे शोधकार्य राबवले जाणार आहे.

मंगळवारी रात्री इंदापूर तालुक्यातील म्हसोबावाडी येथील एका विहीरीच्या रिंगचे काम सुरू असताना मातीचा मलबा कोसळून चार कामगार गाडले गेल्याची घटना घडली. यामध्ये सोमनाथ लक्ष्मण गायकवाड, जावेद अकबर मुलाणी, परशुराम बन्सीलाल चव्हाण आणि मनोज मारुती सावंत (सर्व रा. बेलवाडी, ता. इंदापूर) हे चार कामगार अडकले आहेत.

काल रात्री घडलेल्या या घटनेनंतर माजी राज्यमंत्री दत्तात्रय भरणे यांनी जिल्हाधिकाऱ्यांसह अन्य प्रशासकीय यंत्रणेशी संपर्क साधत मदतकार्य सुरू केले. आज पहाटे ५ वाजताच ते घटनास्थळी दाखल झाले. या दरम्यान एनडीआरएफची दोन पथकेही दाखल झाली आहे. पहाटेपासून पोकलेनच्या सहाय्याने या ठिकाणची माती उपासण्याचं काम सुरू आहे. विहीरीची खोली तब्बल १२५ फुट असल्यामुळे मातीचं प्रमाणही जास्त आहे.

आज दिवसभर हे मदतकार्य राबवण्यात आले. परंतु संबंधित कामगारांचा शोध लागलेला नाही. दुसरीकडे संध्याकाळी अंधार पडल्यानंतर हे मदतकार्य थांबवण्यात आले आहे. उद्या सकाळी पुन्हा हे मदतकार्य सुरू केले जाणार असल्याचं प्रशासनाकडून सांगण्यात आलं. दरम्यान, या घटनेला जवळपास १७ तास उलटून गेले आहेत. मात्र अद्याप या कामगारांचा शोध लागलेला नाही. त्यामुळे नातेवाईक आणि स्थानिक ग्रामस्थांमध्ये चिंतेचं वातावरण निर्माण झालं आहे.