BIG NEWS : टोमॅटोची वाहतूक करणारा ट्रॅक्टर पलटी; तीन महिला ठार, सहा महिला जखमी

दौंड : प्रतिनिधी

दौंड तालुक्यातील रावणगाव येथे टोमॅटोची वाहतूक करणारा ट्रॅक्टर पलटी झाला. या अपघातात तीन महिला ठार झाल्या असून सहा महिला जखमी झाल्या. गुरुवारी सायंकाळी ही घटना घडली. या घटनेत जखमी झालेल्या महिलांना भिगवण आणि दौंड येथे रुग्णालयात उपचारासाठी हलवण्यात आले आहे.

याबाबत अधिक माहिती अशी की, काल सायंकाळी पाचच्या सुमारास टोमॅटोने भरलेला ट्रॅक्टर-ट्रॉली शेतातून बाहेर काढला जात होता. त्या सुमारास ट्रॅक्टर चालकाचे नियंत्रण सुटून ट्रॅक्टरची ट्रॉली खडकवासला धरणाच्या फाट्यामध्ये अडकून पलटी झाली. ट्रॉलीमध्ये ७५ ते ८० टोमॅटोचे कॅरेट भरलेले होते. तसेच ९ महिला मजूर ट्रॉलीमध्ये बसलेल्या होत्या. ट्रकर पलटी झाल्याने त्या महिला जखमी झाल्या.

अपघाताची माहिती मिळाल्यानंतर तातडीने ग्रामस्थांनी घटनास्थळी धाव घेऊन बचावकार्य सुरू केले. सुमारे एक तासाच्या नंतर जेसीबीच्या साह्याने पलटी झालेल्या ट्रॅक्टर बाजूला करण्यात ग्रामस्थांना यश आले. ट्रॉलीखाली अडकलेल्या महिलांना ग्रामस्थांनी तातडीने रुग्णालयात उपचारासाठी दाखल केले.

उपचारादरम्यान तीन महिलांचा मृत्यू झाला आहे. या सर्व महिला रोजंदारीवर काम करणाऱ्या होत्या. तसेच सर्व महिला एकाच वस्तीवर राहणाऱ्या होत्या. त्यामुळे गावात शोककळा पसरली आहे.