देवदर्शनावरुन परतताना काळाचा घाला; टेम्पोच्या अपघातात सहा भाविक ठार, चार जखमी

नाशिक : प्रतिनिधी

नाशिक जिल्ह्यातील मालेगाव तालुक्यात चंदनपुरी येथील खंडेराव महाराजांच्या दर्शनासाठी आलेल्या भाविकांच्या टेम्पोचा भीषण अपघात झाला. भरधाव वेगातील पिकअपने धडक दिल्यामुळे झालेल्या या अपघातात सहा भाविक जागीच ठार झाले. तर चौघेजण गंभीररित्या जखमी झाले आहेत. रविवारी सायंकाळी सहा वाजण्याच्या सुमारास हा अपघात झाला. 

जळगाव जिल्ह्यातील चाळीसगाव तालुक्यामधील मुंदखेडा येथील भाविक खंडेराव महाराजांच्या दर्शनासाठी आले होते. दर्शनाचा कार्यक्रम घेतल्यानंतर हे भाविक पुन्हा आपल्या गावाकडे निघाले. गिगाव फाट्यावर भरधाव वेगात भाविकांच्या टेम्पोची आणि समोरून येणाऱ्या एका पिकअपची जोरदार धडक झाली.

त्यामध्ये भाविकांचा टेम्पो पलटी होवून सहा भाविकांचा जागीच मृत्यू झाला. स्थानिक नागरिकांनी टेम्पोमध्ये अडकलेल्या भाविकांना बाहेर काढले. घटनेची माहिती समजल्यानंतर मालेगाव पोलिसांनी रुग्णवाहिकेसह तात्काळ घटनास्थळी धाव घेतली. जखमी भाविकांना खाजगी रुग्णालयात उपचारासाठी दाखल करण्यात आले आहे.