पंढरपूर : प्रतिनिधी
सोलापूर-पुणे महामार्गावर पंढरपूरला दर्शनासाठी चाललेल्या वारकऱ्यांच्या ट्रॅक्टरला ट्रकने जोराने धडक दिल्याने सात वारकऱ्यांचा मृत्यू झाला आहे. तर जवळपास ३० ते ३५ वारकरी गंभीर जखमी आहेत. रविवारी रात्री ही घटना कोंडी ते केगावदरम्यान घडली.
याबाबत माहिती अशी की, वारकरी एकादशी निमित्ताने तुळजापूर तालुक्यातील कदमवाडी येथून पंढरपूरला चालले होते. रस्त्यात कोंडी या गावानजीक वारकऱ्यांच्या ट्रॅक्टरला भरधाव मालवाहू ट्रकने जोरदार धडक दिली. ट्रकची धडक इतकी भीषण होती की, वारकऱ्यांचा ट्रॅक्टर जवळपास ६००फूट फरफटत गेला.
अपघाताची माहिती मिळताच पोलिसांनी तातडीने घटनास्थळी धाव घेत बचावकार्य सुरू केले. जखमींना सोलापूरच्या शासकीय रुग्णालयात हलविण्यात आले आहे. त्यांच्यावर उपचार सुरू असून अपघातामध्ये मृतांचा आकड्यामध्ये वाढ होण्याची शक्यता वर्तवली जात आहे.