नांदेड : प्रतिनिधी
काँग्रेसचे माजी अध्यक्ष राहुल गांधींनी देशभरात भारत जोडो यात्रा सुरू केलेली आहे. काल ही यात्रा नांदेड जिल्ह्यातून जात होती. येथून जात असताना काल रात्री ९ वाजण्याच्या सुमारास एक जोरदार अपघात झाला. या यात्रेत सामील असणाऱ्या एका ट्रकने दोघांना दिलेल्या धडकेत एकजण जागीच ठार झाला, तर दुसरा व्यक्ती जखमी झाला आहे.
गुरुवारी नांदेड जिल्ह्यातील या यात्रेचा चौथा दिवस होता. मोंढा परिसरात सभा झाल्यावर ही भारत जोडो यात्रा महादेव पिंपळगाव या ठिकाणी गेली. गणेशन (वय ६२) असे मृत व्यक्तीचे नाव असून सययुल (वय ३०) हे जखमी झाले आहेत. हे दोघेजण महादेव पिंपळगाव या मार्गावरून पायी चालत चालले असताना अचानक ट्रकने त्यांना धडक मारली.
हा अपघात झाल्यानंतर लगेचच त्यांना सरकारी रुग्णालयात हलविण्यात आले. तामिळनाडू येथील हे दोघेही रहिवासी आहेत. माजी मुख्यमंत्री अशोक चव्हाण आणि आमदार मोहन हंबर्डे यांना अपघाताची बातमी कळताच त्यांनी लगेचच हॉस्पिटलमध्ये धाव घेतली. यावेळी गणेशन यांच्या डोक्याला जोरदार मार लागल्यामुळे त्यांचा जागीच मृत्यू झाला असल्याचे डॉक्टरांकडून सांगण्यात आले.