Breaking News : पुण्यातील रणरागिणी ॲड. रुपाली पाटील ठोंबरे यांचा मनसेला ‘जय महाराष्ट्र’..!

पुणे : प्रतिनिधी

महराष्ट्र नवनिर्माण सेनेच्या पुण्यातील नेत्या रुपाली पाटील ठोंबरे यांनी पक्षाचा राजीनामा दिला आहे. पक्षांतर्गत कलहामुळे रुपाली पाटील यांनी मनसेला जय महाराष्ट्र केला असून लवकरच त्या राष्ट्रवादीत प्रवेश करणार आहेत. दरम्यान, मनसे अध्यक्ष राज ठाकरे यांचा दौरा अवघ्या दोन दिवसांवर असताना रुपाली पाटील यांनी दिलेल्या राजीनाम्यामुळे खळबळ उडाली आहे.

मागील काही दिवसांपासून रुपाली पाटील या मनसेला सोडचिठ्ठी देतील असा कयास बांधला जात होता. स्वतः रुपाली पाटील यांनीही पक्षांतर्गत कलहामुळे मनसेला सोडचिठ्ठी देण्याचे संकेत दिले होते. अखेर मंगळवारी त्यांनी पक्षाचे अध्यक्ष राज ठाकरे यांना पत्र लिहित आपल्या सर्व पदांचा राजीनामा दिला. मनसे नेते अनिल शिदोरे यांच्याकडे त्यांनी आपला राजीनामा सुपुर्द केला आहे.

पुण्यातील डॅशिंग व्यक्तीमत्व म्हणून प्रसिद्ध असलेल्या रुपाली पाटील यांनी स्वकर्तृत्वाच्या जोरावर आणि आपल्या बेधडक स्वभावामुळे पुण्यातील राजकारणात स्वतःचे स्थान निर्माण केले आहे. राज ठाकरे यांचा पुणे दौरा अवघ्या दोन दिवसांवर असताना त्यांनी मनसेचा राजीनामा दिला आहे. त्यामुळे पुण्यात मनसेला मोठे खिंडार पडले आहे. एकीकडे राज ठाकरे हे पक्ष बांधणी करत असतानाच रुपाली पाटील यांच्या राजीनाम्यामुळे मनसेला मोठा धक्का बसला आहे.

राष्ट्रवादीत प्रवेश होणार..?

मनसेला जय महाराष्ट्र केल्यानंतर रुपाली पाटील या उपमुख्यमंत्री अजित पवार यांच्या उपस्थितीत राष्ट्रवादी कॉंग्रेसमध्ये प्रवेश करणार असल्याच्या चर्चा सुरु झाल्या आहेत. नुकतीच त्यांनी अजित पवार यांची भेट घेतली होती. त्यानंतर अवघ्या काही दिवसांतच त्यांनी मनसेचा राजीनामा दिला आहे.