मुंबई : प्रतिनिधी
ड्रग्स प्रकरणावरून गेल्या काही दिवसांपासून महाविकास आघाडी आणि भाजपामध्ये आरोप प्रत्यारोप सुरू आहेत. विरोधी पक्षनेते देवेंद्र फडणवीस यांनी राष्ट्रवादीचे नेते आणि अल्पसंख्यांक मंत्री नवाब मलिक यांचा अंडरवर्ल्डशी संबंध असल्याचा आरोप केला आहे. स्वत:वरील आरोप दाबण्यासाठी देवेंद्र फडणवीस यांनी नवाब मलिक यांचे प्रकरण बाहेर काढले असल्याचा आरोप वंचित बहुजन आघाडीचे अध्यक्ष प्रकाश आंबेडकर यांनी केला आहे.
देवेंद्र फडणवीस हे मुख्यमंत्री होते. त्यावेळी त्यांना नवाब मलिक यांनी जमीन खरेदी केली हे माहिती होते. तेव्हा त्यांनी मलिक यांच्यावर कारवाई का केली नाही असा सवाल करून प्रकाश आंबेडकर म्हणाले, आपल्या प्रकरणावरून लक्ष हटवण्यासाठी दुसरी माहिती समोर आणायची ही पद्धत आहे. फडणवीसांनी आपल्यावरील आरोप आणि स्वत:चे प्रकरण दाबण्यासाठीच मलिक यांचे प्रकरण बाहेर काढले आहे.
या सगळ्या प्रकरणांमध्ये न्यायालयाची भूमिका महत्वपूर्ण आहे. न्यायालयाने आतापर्यंत देवेंद्र फडणवीस यांच्यावर दाखल असलेले सगळे खटले निकाली काढायला हवेत, अशी मागणीही प्रकाश आंबेडकर यांनी यावेळी केली आहे.
