मुंबई : प्रतिनिधी
बॉलिवूडची प्रसिद्ध अभिनेत्री प्रीती झिंटा आणि तिचा नवरा जीन गुडनफ यांनी नुकतीच एक गोड बातमी देऊन त्यांच्या चाहत्यांना आश्चर्याचा धक्का दिला आहे. प्रीती झिंटा वयाच्या ४६ व्या वर्षी दोन मुलांची आई बनली आहे. तिने स्वत: एका खास पोस्टद्वारे चाहत्यांसोबत ही गोड बातमी शेअर केली आहे. विशेष म्हणजे ही दोन्ही मुले जुळी आहेत, ज्यांचे नावही प्रितीने तिच्या पोस्टमध्ये नमूद केले आहे. प्रितीने ही बातमी सोशल मीडियावर शेअर करताच तिच्यावर सर्वत्र अभिनंदनाचा वर्षाव सुरू झाला आहे.
प्रितीने तिच्या इन्स्टाग्राम अकाऊंटवर पती जीनसोबतचा एक फोटो शेअर केला आहे. या पोस्टमध्ये त्यांनी जुळ्या मुलांशी संबंधित गोड बातमी दिली आहे. जुळी मुले एक मुलगा आणि एक मुलगी आहेत, ज्यांची नावे प्रीतीने जय आणि जिया अशी दिली आहेत. वयाच्या ४६ व्या वर्षी प्रीती झिंटा सरोगसीच्या मदतीने आई बनली असल्याची बातमी अनेक प्रसारमाध्यमांनी दिली आहे. मात्र प्रितीने तिच्या पोस्टमध्ये याबाबत कोणतीही माहिती दिलेली नाही.
ही पोस्ट शेअर करत प्रीतीने कॅप्शनमध्ये लिहिले- “सर्वांना नमस्कार, मला तुमच्या सर्वांसोबत एक चांगली बातमी शेअर करायची आहे. जीन आणि मी खूप आनंदी आहोत. आज आम्ही आमच्या कुटुंबात जय झिंटा गुडनफ आणि जिया झिंटा गुडनफ या जुळ्या मुलांचे स्वागत करत आहेत.” त्यामुळे प्रितीच्या या पोस्टवर अनेक चाहते प्रतिक्रिया देत आहेत.
