मुंबई : प्रतिनिधी
१९४७ साली मिळालेलं स्वातंत्र्य हे भीक होतं या अभिनेत्री कंगणा राणावतच्या म्हणण्याला समर्थन देणाऱ्या अभिनेते विक्रम गोखले यांच्यावर सध्या सर्वच स्तरातून टिका होत आहे. अशातच अभिनेत्री स्वरा भास्करने विक्रम गोखलेंवर अत्यल्प शब्दांत हल्ला चढवला आहे. विक्रम गोखले यांच्या विधानाची बातमी शेअर करत त्यावर ‘पद्म पुरस्कार येत आहे’ अशी प्रतिक्रिया स्वरा भास्करने व्यक्त केली आहे.
कंगणा राणावत हिला पद्मश्री पुरस्काराने गौरवण्यात आले. त्यानंतर एका वृतवाहिनीला दिलेल्या मुलाखतीत तिने आपल्याला जे स्वातंत्र्य मिळाले ते भीक होती, देशाला खरे स्वातंत्र्य २०१४ मध्येच मिळाले असल्याचे वादग्रस्त वक्तव्य केले. तिच्या या विधानाचा सर्वच स्तरातून समाचार घेतला जात आहे. या दरम्यान, ज्येष्ठ अभिनेते विक्रम गोखले यांनी कंगणाच्या वक्तव्याचे समर्थन करत स्वत:ही वादग्रस्त विधान केले.
कुणाच्याही मदतीने स्वातंत्र्य मिळाले नाही, तर ते भिकेनेच मिळाले आहे. आपले स्वातंत्र्यवीर जेव्हा फाशीवर जात होते तेव्हा फाशीपासून त्यांना कोणी वाचवलं नाही. अनेकजण बघत राहिले असा गंभीर आरोप विक्रम गोखले यांनी केला होता. याच विधानांची बातमी शेअर करत त्यावर ‘पद्म पुरस्कार येत आहे’ अशी प्रतिक्रिया जोडत स्वरा भास्करने विक्रम गोखले यांच्यावर निशाणा साधला आहे.
वादग्रस्त विधानं करून पद्म पुरस्कार मिळवता येतो असा तर रोख स्वराच्या या ट्विटचा नाही ना? असं म्हणत ट्विटवर नेटकऱ्यांच्या संमिश्र अशा प्रतिक्रिया व्यक्त केल्या आहेत.
