मुंबई : प्रतिनिधी
महाराष्ट्राचे माजी गृहमंत्री अनिल देशमुख यांच्या अटकेनंतर महाराष्ट्राच्या राजकारणात खळबळ उडाली आहे. याची मोठी किंमत चुकवावी लागेल, असा इशारा राष्ट्रवादीचे अध्यक्ष शरद पवार यांनी भाजपला दिला आहे. त्याचवेळी शिवसेना नेते संजय राऊत यांनीही पवारांच्या वक्तव्याचं समर्थन करत भाजपवर हल्ला चढवला आहे.
आमच्या लोकांवर खोटे आरोप करुन आणि खोट्या पुराव्याच्या आधारे तुरुंगात पाठवले जाते किंवा केंद्रीय एजन्सीकडून त्यांचा छळ केला जातो. आम्ही त्यापैकी एक होतो. पण आम्ही घाबरणार नाही अशा शब्दांत संजय राऊत यांनी भाजपवर निशाणा साधला आहे.
दरम्यान, महाराष्ट्राचे माजी गृहमंत्री अनिल देशमुख यांच्यावर खोटे आरोप केल्यानंतर मुंबईचे माजी पोलीस आयुक्त फरार झाले आहेत. ते आरोप सिद्ध करण्यासाठी ते स्वत: पुढे येत नाहीत. भाजपने अनिल देशमुख यांना तुरुंगात टाकले आहे. अशा स्थितीत भाजपने आता जे काही केले, त्याची किंमत त्यांना चुकवावी लागेल, असे विधान शरद पवार यांनी केले होते.
