नागपूर : प्रतिनिधी
संपूर्ण राज्याचे लक्ष लागलेल्या विधानपरिषदेच्या नागपूर स्थानिक स्वराज्य मतदार संघातून भाजपचे चंद्रशेखर बावनकुळे यांनी मोठ्या फरकाने विजय मिळवला आहे. चंद्रशेखर बावनकुळे यांनी ३६२ मते मिळवत काँग्रेस पुरस्कृत उमेदवार मंगेश देशमुख यांचा पराभव केला आहे. पालकमंत्री डॉ. नितीन राऊत आणि पशुसंवर्धन मंत्री सुनील केदार यांनी या निवडणुकीसाठी प्रतिष्ठा पणाला लावली होती.
नागपूर स्थानिक स्वराज्य संस्थेच्या या निवडणुकीमध्ये एकूण ५४४ मतदार होते. यामध्ये भाजपाकडे ३१८ मतदार होते. प्रत्यक्षात चंद्रशेखर बावनकुळे यांना ३६४ मते पडली आहेत. काँग्रेसकडे असलेल्या कोट्यामधून भाजपाला ४४ मते फोडण्यात यश मिळाले आहे. काँग्रेसपुरस्कृत उमेदवार मंगेश देशमुख यांना १८६ मिळाली आहेत, तर काँग्रेसचे उमेदवार छोटू भोयर यांना केवळ एकच मत मिळालं आहे. मतदानाला काही तास शिल्लक असतानाच काँग्रेसने अपक्ष उमेदवार मंगेश देशमुख यांना अधिकृत पाठिंबा दिला होता. मात्र काँग्रेसचा हा डाव असफल ठरला आहे.
दरम्यान, या विजयानंतर चंद्रशेखर बावनकुळे यांनी केंद्रीय मंत्री नितिन गडकरी आणि विरोधी पक्षनेते देवेंद्र फडणवीस यांचे आभार मानले आहेत. तसेच या निवडणुकीत मतदान करणाऱ्या सर्व मतदारांचेही आभार मानले आहेत. हा पराभव छोटू भोयर किंवा मंगेश देशमुखांचा नसून काँग्रेसमध्ये हुकूमशाही निर्माण करणारे नाना पटोले यांचा आहे, अशी प्रतिक्रिया त्यांनी व्यक्त केली.