बारामती : प्रतिनिधी
बारामती तालुक्यातील कोर्हाळे बुद्रुक परिसरात ऊस तोडणीसाठी आलेल्या कामगाराच्या मुलावर भटक्या कुत्र्यांनी हल्ला केल्याची धक्कादायक घटना घडली आहे. यामध्ये तीन वर्षांच्या या चिमूकल्याच्या तोंडाला भटक्या कुत्रांनी जोरदार चावा घेतल्यामुळे जबडा व ओठ फाटले गेले आहेत. मात्र बारामतीतील बालरोग तज्ञ डॉ. राजेंद्र मुथा, डॉ. सौरभ मुथा आणि यांच्या सहकाऱ्यांनी शर्थीचे प्रयत्न करत या मुलावर यशस्वीपणे शस्त्रक्रिया केली.
याबाबत माहिती अशी की, सध्या सोमेश्वर सहकारी साखर कारखान्याचा गळीत हंगाम सुरू आहे. त्यासाठी बीड, नगर जिल्ह्यातील ऊसतोडणी कामगार कारखाना परिसरात आले आहेत. पाथर्डी तालुक्यातील राठोड दांपत्यही सोमेश्वर सहकारी साखर कारखान्यावर कामासाठी आले आहे. हे कुटुंब बारामती कोर्हाळे बुद्रुकनजीक वास्तव्य करीत होते. सोमवारी दि. १४ नोव्हेंबर रोजी सायंकाळच्या सुमारास या कुटुंबातील तीनवर्षीय मुलगा युवराज राठोड हा कोपीसमोर खेळत होता. त्यावेळी अचानकपणे भटक्या कुत्र्यांनी त्याच्यावर हल्ला चढवला. त्यामध्ये युवराजचा संपूर्ण जबडा, ओठ कुत्र्यांनी फाडून काढले.
या गंभीर स्थितीत कुटुंबीयांनी या चिमूरड्याला बारामतीतील श्रीपाल हॉस्पिटलमध्ये दाखल केले. त्या ठिकाणी डॉ. राजेंद्र मुथा, डॉ. सौरभ मुथा आणि डॉ. आशुतोष आटोळे यांनी संबंधित मुलाची स्थिती लक्षात घेत तात्काळ उपचार सुरू केले. त्यानंतर या मुलावर शास्त्रक्रियेचा निर्णय घेण्यात आला. सोमवारी रात्री उशीरा या मुलावर यशस्वीपणे शस्त्रक्रिया करण्यात आली असून त्याच्या जबड्याला तब्बल ५५ टाके घालण्यात आले आहेत.