धक्कादायक : वर्षाखेरीस पिंपळीत अपघात; ट्रकच्या धडकेत २२ वर्षीय युवकाचा मृत्यू

डोर्लेवाडी : वार्ताहर
उद्यापासून नवीन वर्षाला सुरुवात होत आहे. आज सरत्या वर्षाचा शेवटचा दिवस आहे आणि याच दिवशी बारामती तालुक्यातील झारगडवाडी गावच्या ज्ञानेश्वर आनंदा मदने (वय २२) याचा बारामती इंदापूर रोडवरील पिंपळी नजीक येथील देवकाते वस्ती याठिकाणी अपघात झाला. या अपघातात ज्ञानेश्वर चा जागीच मृत्यू झाला आहे. यामुळे झारगडवाडी गावावर शोककळा पसरली आहे.
सविस्तर माहिती अशी की, (एमएच १६ एएम ६१११) हा ट्रक इंदापूर-बारामती या राज्यमार्गावरून बारामती दिशेला जात होता. त्याचावेळी ज्ञानेश्वर मदने (रा. झारगडवाडी) हा भवानीनगर दिशेने दुचाकी वरून चालला होता. दरम्यान बारामती-इंदापूर रस्त्यावरील पिंपळीनजीक देवकाते वस्तीवर ट्रकने दुचाकीला जोरदार धडक दिली. त्यामध्ये दुचाकी बाजूला पडून ज्ञानेश्वर मदने हा या ट्रक खाली आला. ट्रकचे चाक ज्ञानेश्वरच्या तोंडावरून गेल्याने अक्षरशः त्याच्या चेहऱ्याचा चेंदामेंदा झाला.
सरत्या वर्षाच्या शेवटच्या आणि उद्या नवीन वर्षाच्या तोंडावर ज्ञानेश्वर आनंदा मदने याचा दुर्दैवी अपघाती मृत्यू झाल्याने मदने कुटूंबियांवर दुःखाचा डोंगर कोसळला आहे. झारगडवाडी गावांवर देखील शोककळा पसरली आहे. घटनास्थळी शहर पोलीसांनी धाव घेत ट्रक आणि चालकाला ताब्यात घेतले आहे. अधिक तपास बारामती शहर पोलीस करीत आहेत.