मोठी बातमी : रेल्वे प्रशासनाला बारामतीकरांचा दणका; आठ दिवसात सर्व्हिस रोडसाठी ना हरकत मिळणार

बारामती : प्रतिनिधी

गेल्या तीन वर्षांपासून बारामती शहरातील सर्व्हिस रोडसाठी रेल्वे प्रशासनाकडून ना हरकत प्रमाणपत्र मिळत नसल्याने हे काम प्रलंबित आहे. त्यामुळे आज बारामतीत राष्ट्रवादीच्या कार्यकर्त्यांनी थेट रेल्वे धक्क्याकडे जाणाऱ्या रस्त्यावर प्रवेश बंद करत रेल्वे प्रशासनाला झुकवले. त्यानंतर येत्या आठ दिवसांत सर्व्हिस रोडच्या कामासाठी ना हरकत प्रमाणपत्र देण्याचे आश्वासन रेल्वे प्रशासनाने दिले आहे. त्यामुळे गेल्या अनेक वर्षांपासून रखडलेल्या सर्व्हिस रोडच्या कामातील अडथळा दूर झाला आहे. 

बारामती शहरातील भिगवण रस्ता हा प्रचंड वर्दळ असणारा रस्ता.. हा रस्ता वाहतुकीसाठी कमी पडत असल्याने उपमुख्यमंत्री अजित पवार यांनी सर्व्हिस रोडला मंजुरी दिली. त्यासाठी आवश्यक असलेला निधी देवून या कामाला सुरुवातही करण्यात आली. मात्र तीन हत्ती चौक ते पंचायत समितीपर्यंतच्या सर्व्हिस रोडचे काम रेल्वे खात्याचे ना हरकत प्रमाणपत्र मिळत नसल्याने रखडले आहे. 

वारंवार पाठपुरावा करूनही रेल्वे प्रशासनाकडून या कामासाठी ना हरकत प्रमाणपत्र मिळत नसल्याने आज बारामती नगरपरिषदेच्या पदाधिकाऱ्यांसह राष्ट्रवादीच्या कार्यकर्त्यांनी आक्रमक पवित्रा घेतला. गटनेते सचिन सातव यांच्यासह कार्यकर्त्यांनी रेल्वे धक्क्याकडे जाणाऱ्या रस्त्यावर प्रवेश बंद केला. त्यामूळे सकाळपासून रेल्वे धक्क्याकडे जाणारी वाहने अडवली गेली. ही बाब समजल्यानंतर रेल्वे प्रशासनाची चांगलीच धावपळ उडाली. 

उपमुख्यमंत्री अजित पवार, खासदार सुप्रिया सुळे यांच्याशी रेल्वे प्रशासनातील वरीष्ठ अधिकाऱ्यांनी संपर्क साधत येत्या आठ दिवसात ना हरकत प्रमाणपत्र देण्याचे आश्वासन दिले. त्यानंतर उपस्थित कार्यकर्त्यांनी फटाके वाजवत जल्लोष करत आंदोलनाची सांगता केली. एकूणच काय तर आज बारामतीकरांच्या दणक्यामुळे रेल्वे प्रशासन झुकले असून गेली अनेक वर्षे रखडलेल्या सर्व्हिस रोडचे काम मार्गी लागणार आहे.