चंदन विक्री करणाऱ्या टोळीला माळेगाव पोलिसांनी केले गजाआड

बारामती : प्रतिनिधी

माळेगाव पोलिसांनी पुन्हा एकदा धडाकेबाज कारवाई करत चंदन विक्री करणाऱ्या आरोपींना ताब्यात घेतले आहे. या प्रकरणी माळेगाव परिसरात वास्तव्यास असलेल्या सचिन दीक्षित भोसले (वय २८ वर्ष), ऋषिकेश सुदाम पवार (वय १९ वर्ष), राजेंद्र लक्ष्मण कुचेकर (वय २५ वर्ष) या तिघांना ताब्यात घेण्यात आले आहे.

पोलिस सूत्रांकडून मिळालेली माहिती अशी की, सचिन भोसले हा माळेगाव खुर्द रोड येथे पाण्याच्या टाकी जवळ चंदन विक्रीसाठी घेऊन थांबला असल्याची माहिती माळेगावचे सहाय्यक पोलीस निरीक्षक राहुल घुगे यांना मिळाली. त्यानुसार राहुल घुगे यांच्यासह पोलीस हवालदार शाशिकांत वाघ, पोलीस नाईक दत्तात्रेय चांदणे, पोलीस शिपाई प्रशांत राऊत, दीपक दराडे यांनी छापा टाकून आरोपीस ताब्यात घेतले.

या आरोपींकडून ४८ किलो ४०० ग्रॅम वजनाचे १७ हजार रुपये किमतीचे कच्चे चंदन जप्त करण्यात आले आहे. या र आरोपीना पुढील कारवाईसाठी बारामती वन विभागाच्या ताब्यात देण्यात आले आहे.  बारामती तालुका पोलीस ठाण्याचे पोलिस निरीक्षक महेश ढवाण यांच्या मार्गदर्शनाखाली सहायक पोलिस निरीक्षक राहुल घुगे यांनी ही यशस्वी कामगिरी केली.