बारामती : प्रतिनिधी
बारामती तालुक्यातील माळेगांव, सांगवी परीसरात घरफोडी करणाऱ्या गुन्हेगाराला बारामती तालुका पोलिसांनी गजाआड केले आहे. महेश भिमा शिंदे (रा.सांगवी ता. फलटण, जि. सातारा) असे त्याब्यात घेतलेल्या सराईत आरोपीचे नाव आहे.
गेल्या चार महीन्यापासून बारामती, शारदानगर, माळेगांव, सांगवी भागांमध्ये घरफोडी आणि चोरीचे प्रमाण
वाढल्याने पोलीस अधिक्षक डॉ. अभिनव देशमुख यांनी तपासाच्या सुचना दिल्या होत्या. या पार्श्वभूमीवर बारामती तालुका पोलीस ठाण्याचे पोलीस निरीक्षक महेश ढवाण यांनी तपास पथकास अभिलेखावरील आरोपींसह ठिकठिकाणचे सीसीटीव्ही फुटेज तपासण्याच्या सुचना दिल्या होत्या.
सहाय्यक पोलीस निरीक्षक राहूल घुगे यांच्यासह तपास पथकातील कर्मचाऱ्यांनी तात्काळ घटनास्थळी भेट देवून आजूबाजूचे सिसिटीव्ही व तांत्रीक माहीतीचे आधारे आरोपींचा शोध सुरू केला. यातील आरोपींचा शोध सुरू असतांना राहूल घुगे यांना सांगवी येथील इसम नामे महेश भिमा शिंदे याने त्याच्या साथीदारांसह हे गुन्हे केल्याची माहिती मिळाली. त्यानुसार या पथकाने महेश शिंदे याला बारामती तालुक्यातील सांगवी येथे सापळा रचून शिताफीने अटक केली आहे.
या आरोपीला दि. १४ ऑक्टोबरपर्यंत पोलीस कोठडी देण्यात आली आहे. गुन्हयाचा पुढील तपास सहाय्यक पोलीस निरीक्षक राहूल घुगे हे करीत आहेत. दरम्यान, या आरोपीकडे अधिक चौकशी केली असता, त्याने शारदानगर येथे झालेली एटीएम फोडण्याचा प्रयत्न, देवकाते पाटीलगनगर येथील घरफोडीचा गुन्हा केल्याची कबुली दिली आहे. त्याच्याकडून साडेचार तोळे सोन्याचे दागिने जप्त करण्यात आले आहे. तर या गुन्ह्यात चोरलेले सोने विक्री करणाऱ्या बाळकृष्ण तात्याबा यादव यालाही अटक करण्यात आली आहे.
आरोपीने फलटण ग्रामीण पोलीस ठाण्याच्या हद्दीत ए. व्ही. गार्डन परमीट रूममधून दिड लाख रूपयांपेक्षा जास्त किंमतीची दारू चोरून नेल्याचीही कबुली दिली आहे. हा आरोपी फलटण शहर आणि फलटण ग्रामीण पोलीस ठाण्याच्या अभिलेखावरील आरोपी असून त्याचेवर ११ घरफोडीसह एक दरोड्याचा गुन्हा दाखल आहे.
पोलिस अधीक्षक अभिनव देशमुख, अप्पर पोलीस अधिक्षक मिलींद मोहीते, उपविभागीय पोलीस अधिकारी गणेश इंगळे, पोलीस निरीक्षक महेश ढवाण यांच्या मार्गदर्शनाखाली सहाय्यक पोलीस निरीक्षक राहुल घुगे, महेश विधाते, पोलीस हवालदार रावसाहेब गायकवाड, शशिकांत वाघ, पोलीस नाईक राजेंद्र काळे, दत्तात्रय चांदणे, पोलिस शिपाई प्रशांत राउत, दिपक दराडे, तपास पथकाचे विजय वाघमोडे, नंदू जाधव, विनोद लोखंडे, राहूल पांढरे यांनी केली आहे.
