बारामती तालुक्यातील कऱ्हावागजमधील धक्कादायक घटना
बारामती : प्रतिनिधी
अंगणात कोंबड्या आल्याच्या किरकोळ कारणावरून झालेल्या वादात डोक्यात कुऱ्हाडीने वार करत महिलेची निर्घृण हत्या केल्याचा धक्कादायक प्रकार बारामती तालुक्यातील कऱ्हावागजमध्ये सोमवारी घडला. याप्रकरणी बारामती तालुका पोलिसांनी आरोपीला तात्काळ अटक केली आहे.
गंगूबाई तात्याराम मोरे असे या घटनेत मयत झालेल्या महिलेचे नाव आहे. याप्रकरणी किरण दादा मोरे याला अटक केली आहे. याप्रकरणी तालुका पोलीस ठाण्याचे पोलीस निरीक्षक महेश ढवाण यांनी सांगितले की, मयत महिला आणि आरोपीचे घर समोरासमोर आहे. दोन्ही कुटुंबामध्ये अंगणात कोंबड्या येण्यावरुन आणि पाच फूटांच्या जागेवरुन वारंवार वाद होत होता.
रविवारी दुपारी देखील याच कारणामुळे आरोपीच्या बायको सोबत गंगुबाई यांचा वाद झाला होता. यावेळी रागाच्या भरात किरण याने गंगूबाईच्या डोक्यावर कुऱ्हाडीने वार केला. या हल्ल्यात गंगुबाई गंभीर जखमी झाल्या. उपचारासाठी दवाखान्यात दाखल करण्यापूर्वीच त्यांचा जागीच मृत्यू झाला.
या प्रकरणी किरण मोरे याला पोलिसांनी तात्काळ अटक केली असून पुढील तपास सहाय्यक पोलीस निरीक्षक महेश विधाते करीत आहेत.