कराड : प्रतिनिधी
राज्यातील राजकारणात मुख्यमंत्री बदलाच्या चर्चा सुरू असून प्रामुख्याने विरोधी पक्षनेते अजित पवार यांचे नाव मुख्यमंत्रीपदासाठी चर्चेत आहे. अशातच आता राष्ट्रवादी कॉँग्रेसचे प्रदेशाध्यक्ष जयंत पाटील यांनी पुढील काळात राष्ट्रवादीचाच मुख्यमंत्री असेल असा दावा केला आहे. त्यामुळे आता राजकीय वर्तुळात पुन्हा एकदा चर्चा रंगल्या आहेत.
एकनाथ शिंदे यांच्या मुख्यमंत्रीपदावरून मागील काही दिवसांपासून चर्चा रंगत आहेत. अशातच काल बाजार समिती निवडणुकांमध्ये राष्ट्रवादी कॉँग्रेसने आणि महाविकास आघाडीने घवघवीत यश मिळवले आहे. या पार्श्वभूमीवर कराड दौऱ्यावर असताना प्रदेशाध्यक्ष जयंत पाटील यांनी केलेल्या वक्तव्यामुळे राजकीय क्षेत्रात आता पुन्हा एकदा मुख्यमंत्रीपदाची चर्चा रंगली आहे.
महाराष्ट्रात पुढचा मुख्यमंत्री राष्ट्रवादीचा होणार ही बाब सगळ्यांनी मान्य केली आहे. येत्या निवडणुकांमध्ये राष्ट्रवादी हा राज्यातील सर्वात मोठा पक्ष म्हणून समोर येईल असा विश्वास जयंत पाटील यांनी व्यक्त केला आहे. त्यामुळे राज्यातील राजकारणात पुन्हा एकदा चर्चांना उधाण आले आहे.
