नांदेड: प्रतिनिधी
भारतीय राष्ट्रीय काँग्रेसचे उपाध्यक्ष खासदार राहुल गांधी यांची भारत जोडो यात्रा मोठ्या उत्साहात सुरू आहे. महाराष्ट्रात या यात्रेला जनतेमधून प्रचंड प्रतिसाद पाहायाला मिळत आहे. विविध क्षेत्रातील लोक राहुल गांधी यांच्यासोबत यात्रेमध्ये चालताना दिसत आहेत. अशातच राज्यात काँग्रेसचा सहयोगी पक्ष असलेल्या राष्ट्रवादी काँग्रेसचे नेतेही राहुल गांधी यांच्यासोबत आज यात्रेमध्ये चालताना पाहायला मिळाले.
सध्या राहुल गांधी यांची भारत जोडो यात्रा राज्याचा नांदेड जिल्ह्यातून चालली आहे. मोठ्या उत्स्फूर्तपणे विविध क्षेत्रातील लोक या यात्रेत सहभागी होत आहेत. आज राष्ट्रवादी काँग्रेसचे प्रदेशाध्यक्ष जयंत पाटील, खासदार सुप्रिया सुळे, माजी मंत्री जितेंद्र आव्हाड, माजी मंत्री दिलीप वळसे पाटील यांच्या कन्या पूर्वा वळसे हे राहुल गांधी यांच्यासोबत यात्रेत चालताना पाहण्यास मिळाले.
ज्येष्ठ नेते राष्ट्रवादी काँग्रेसचे सर्वेसर्वा शरद पवार हे यात्रेमध्ये सहभागी होणार होते. मात्र त्यांची तब्येत बरी नसल्याने , ते यात्रेत सहभागी होऊ शकेल नाहीत. या पार्श्वभूमीवर राष्ट्रवादी काँग्रेसचे नेते भारत जोडो यात्रेत सहभागी होणार असल्याचे बोलले जात होते. त्यानुसार आज राष्ट्रावादी काँग्रेसचे नेते भारत जोडो यात्रेत सहभागी झाल्याचे पाहायला मिळाले.
