पुणे : प्रतिनिधी
बजाज ग्रूपचे प्रमुख आणि माजी खासदार राहुल बजाज यांचे आज वयाच्या ८३ व्या वर्षी पुण्यात निधन झाले. हृदयविकाराच्या त्रासामुळे त्यांना रुबी हॉल रुग्णालयात दाखल करण्यात आले होते. आज दुपारी अडीच वाजता त्यांची प्राणज्योत मालवली. दरम्यान, पुण्यातील आकर्डी येथील बजाजच्या प्लांटमध्ये त्यांचे पार्थिव अंत्यदर्शनासाठी ठेवण्यात येणार आहे.
१० जून १९३८ साली जन्मलेले राहुल बजाज हे स्वातंत्र्यसैनिक जमनालाल बजाज यांचे नातू होते. अमेरिकेच्या हार्वर्ड बिझनेस स्कूल, सेंट स्टीफस कॉलेज-दिल्ली, गव्हर्नमेंट लॉ कॉलेज, मुंबई आणि कैथड्रल आणि जॉन कॉनन स्कूलमध्ये राहुल बजाज यांनी शिक्षण घेतले होते.
मागील काही दिवसांपासून ते हृदयाच्या त्रासामुळे पुण्यातील रुबी हॉल रुग्णालयात दाखल झाले होते. मात्र वयोमानानुसार त्यांचे शरीर उपचाराला साथ देत नसल्यामुळे आज दुपारी त्यांचे निधन झाले. बजाज यांच्या निधनामुळे विविध स्तरातून शोक व्यक्त केला जात आहे.
