मुंबई : प्रतिनिधी
हिवाळी अधिवेशनाच्या दुसऱ्या दिवशी गुरुवारी पर्यावरणमंत्री आदित्य ठाकरे विधानभवनात प्रवेश करत असताना पायऱ्यावर बसलेले भाजपाचे आमदार नितेश राणे यांनी आदित्य ठाकरे यांची म्याव.. म्याव …. म्याव.. म्हणत खिल्ली उडवलेला व्हिडिओ प्रसारमाध्यमांवर चांगलाच व्हायरल झाला. नितेश राणे यांच्या या खिल्लीला प्रत्युत्तर देताना राष्ट्रवादीचे राष्ट्रीय प्रवक्ते आणि अल्पसंख्याकमंत्री नवाब मलिक यांनी त्यांच्या ट्विटर अकाउंटवरून एक फोटो शेअर करत खिल्ली उडवली आहे.
नवाब मलिक यांनी नितेश राणे यांना प्रत्युत्तर देताना आपल्या ट्विटर अकाउंटवरून एक कोंबड्याचा फोटो शेअर केला आहे. त्या फोटोमध्ये कोंबड्याला मांजरीचे तोंड दाखवण्यात आले आहे. एकप्रकारे मांजर मिश्रित कोंबड्याला दाखवण्यात आले आहे. तसेच फोटोच्या कॅप्शनमध्ये पहचान कोण ? असा प्रश्न नवाब मलिक यांनी उपस्थित नितेश राणे यांची खिल्ली उडवली आहे.
दरम्यान, अधिवेशनाच्या दुसऱ्या दिवशी गुरुवारी नितेश राणे इतर भाजप आमदारांबरोबर विधान भवनाच्या पायर्यांवर आंदोलन करत होते. त्याच दरम्यान आदित्य ठाकरे विधानभवनात पायर्या चढून प्रवेश करत असताना; त्याच पायर्यांवर आंदोलन करत असलेल्या नितेश राणे यांनी आदित्य ठाकरे यांची म्याऊ… म्याऊ … म्याऊ…आवाज काढत खिल्ली उडवली होती.
