मुंबई : प्रतिनिधी
नाशिक येथील झाकीर हुसेन रुग्णालयाच्या ऑक्सीजन टाकीची गळती होवून अनेकांना जीव गमवावा लागला आहे. या घटनेबद्दल देशभरात हळहळ व्यक्त होत असतानाच राष्ट्रवादी कॉँग्रेसचे सर्वेसर्वा शरद पवार यांनीही याबद्दल खेद व्यक्त केला आहे. ही घटना वैद्यकीय यंत्रणेसाठी वेदनादायी आणि आव्हान वाढवणारी असल्याचे शरद पवार यांनी ट्विट केले आहे.
आज दुपारी नाशिकमधील झाकीर हुसेन रुग्णालयातील ऑक्सिजन टाकीची गळती झाली. त्यामध्ये आतापर्यंत २२ जणांचा मृत्यू झाला आहे. या घटनेनंतर राष्ट्रपती रामनाथ कोविंद, पंतप्रधान नरेंद्र मोदी, राहुल गांधी, मुख्यमंत्री उद्धव ठाकरे, मनसे अध्यक्ष राज ठाकरे यांच्यासह राज्य देशातील प्रमुखांनी सहवेदना व्यक्त केल्या आहेत.
नाशिकमधील घटना ही हृदय पिळवटून टाकणारी आहे. यात झालेल्या जीवितहानीमुळे मन हेलावलं असल्याचं ट्विट पंतप्रधान नरेंद्र मोदी यांनी केले आहे. तर या घटनेची सखोल चौकशी होणार असून या घटनेबद्दल राजकारण करण्याची ही वेळ नसल्याचे मुख्यमंत्री उद्धव ठाकरे यांनी म्हटले आहे.
राष्ट्रवादीचे अध्यक्ष शरद पवार यांनीही या घटनेबद्दल दु:ख व्यक्त करत मृतांना श्रद्धांजली अर्पण केली आहे. नाशिक येथील डॉ. झाकिर हुसेन रुग्णालयात अतिशय दुर्दैवी घटनेत रुग्णांना प्राणांस मुकावे लागले. ही दुर्घटना सद्यस्थितीत वैद्यकीय यंत्रणेसाठी वेदनादायी आणि आव्हानं वाढवणारी आहे. मृतांच्या कुटुंबियांच्या दुःखात सहवेदना. भावपूर्ण श्रद्धांजली.. असे शरद पवार यांनी आपल्या ट्विटमध्ये नमूद केले आहे.
